Soma Habari Husika

Kiongozi wa utawala wa kijeshi nchini Burkina Faso ameahidi kurejesha usalama, utulivu na umoja katika nchi hiyo iliyomo katika mgogoro. Hata hivyo ameonya kuwa usaliti hautavumiliwa na utawala wake mpya. Kiongozi huyo, LuteniKkanali Paul-Henri Sandaogo Damiba amelihutubia taifa kwa mara ya kwanza tangu kutwaa mamlaka mapema wiki hii baada ya kumwondoa madarakani rais Roch Marc Christian Kabore aliyechaguliwa kwa njia ya kidemokrasia. Kanali Damiba amesema, Burkina Faso inakabiliwa na mgogoro usiokuwa na kifani na hivyo jukumu la kipaumbele kwa utawala wake wa kijeshi ni kurejesha usalama, kuimarisha ari ya wanajeshi na kusikiliza maoni ya wananchi. Kiongozi huyo wa kijeshi pia ameitaka jumuiya ya kimatifa iiunge mkono nchi yake ili iweze kuanza tena juhudi za kuelekea kwenye maendeleo. Amesema atarejesha katiba wakati utakapokuwa sawa. Viongozi wa Jumuiya ya Kiuchumi ya Afrika Magharibi ECOWAS wanakutana leo kuijadili hali hiyo.