Soma Habari Husika

Waziri wa Mambo ya kigeni wa Urusi Sergei Lavrov amesema leo kuwa Moscow haitaki vita na Ukraine, huku akionyesha matumaini kuhusu mapendekezo ya usalama yaliyowasilishwa na Marekani. Lavrov amesema mapendekezo ya Marekani yalikuwa bora zaidi kuliko yaliyowasilishwa na Juamuiya ya Kujihami ya NATO. Waziri huyo wa mambo ya kigeni wa Urusi amesema anatarajia kukutana na mwenzake wa Marekani Antony Blinken katika wiki chache zijazo. Lavrov amesema Rais Vladmir Putin ataamua jinsi ya kuyajibu mapendekezo hayo. Hapo jana, Rais Joe Biden amesisitiza kwamba Marekani pamoja na washirika wake wataendelea kuiunga mkono Ukraine ili kuweza kujibu kwa ufanisi ikiwa Urusi itaivamia nchi hiyo. Rais Biden amesema hayo katika mazungumzo yake na rais wa Ukraine Volodymyr Zelenksy waliyoyafanya kwa njia ya simu.