Soma Habari Husika

WILDAF,TGNP WASISITIZA UMUHIMU WANAWAKE KUENDELEA KUPATA NAFASI ZAIDI ZA UONGOZI

• Na JZ The Brand
• February 10, 2022

IMEELEZWA lengo la kufikia 50 kwa 50 katika uongozi na nafasi za kufanya maamuzi nchini litafanikiwa tu endapo wanawake zaidi wataendelea kupata nafasi za uongozi kuanzia katika vyama vya siasa, mashirika na taasisi mbalimbali zikiwemo za umma.
Hayo yameelezwa jijini Dar es Salaam na Mkurugenzi wa Shirika la Wanawake katika Sheria na Maendeleo Barani Afrika (WILDAF) Anna Kulaya wakati wa mkutano uliowakutanisha wadau wa masuala yanayohusu Wanawake pamoja na viongozi wa vyama vya siasa.
Kulaya amefafanua kwa sasa Tanzania ni wazi imepiga hatua kubwa katika kumkomboa mwanamke kiasi cha kuwa na Rais mwanamke ambaye ni Mama Samia Suluhu Hassan lakini hiyo haimaanishi ndio iwe mwisho wa kuendelea kumpigia mwanamke katika nafasi za maamuzi.Hivyo amesisitiza 50 kwa 50 itafikiwa endapo wanawake zaidi wataendelea kuaminiwa na kupewa nafasi.

"Sote tunafahamu mlango mkubwa ambao umekuwa ukiwawezesha wanawake kuwa katika nafasi za maamuzi ni siasa ambako huko wanapatikana wabunge, madiwani na hata wenye viti wa serikali za mitaa.Tumetambua umuhimu wa mlango huo wa siasa na ndio maana leo tumekutana na viongozi kutoka Baraza la Vyama vya Siasa nchini na Msajili ili tujadiliane kwa pamoja na kuweka malengo ya kutupeleka mbele".

Amesisitiza ni kweli wanaweza kufurahia kuwa na Rais mwanamke pamoja na Spika wa Bunge mwanamke lakini hiyo haina maana sasa wakarudi nyuma katika jitihada ambazo wamekuwa nazo."Huu si wakati wa kubweta na kurudi nyuma, huu ni wakati wa kuendelea kuweka mikakati zaidi ili kupata wanawake wengi zaidi katika nafasi za uongozi."

Kwa upande wake Mkurgenzi wa Mtandao wa Jinsia Tanzania(TGNP) Lilian Lihundi amesema pamoja na mambo mengine wamefanya uchambuzi wa Katiba na Ilani za vyama vya siasa ambapo wamebaini bado kuna ushiriki mdogo wanawake ingawa kumekuwepo na majukwaa ya wanawake.

"Tunachotaka wanawake na wanaume washiriki kikamilifu katika masuala yanayohusu maamuzi na uongozi na hapo ndipo tutakuwa na maendeleo jumuishi na endelevu nchini kwetu.Kwa mfano wakati wa kuchambua Katiba na Ilani za vyama vya siasa tumegundua miundo ya kutoa maamuzi kwenye vyama haitoi nafasi ya kutosha kwa wanawake,"amesema Lihundi.
Awali wakati akifungua mkutano huo, Naibu Msajili wa Vyama vya Siasa Mohamed Ali Ahmed amepongeza kwa wadau hao kwa kuchagua njia ya majadiliano katika kuzungumzia usawa wa kijinsia katika nafasi za uongozi."Leo mngekaa wanawake peke yenu tungesema mnatuteta, tungesema mnajambo ambalo si nzuri dhidi yetu, lakini mmeamua kutushirikisha wanaume.

"Hali hii tunayokwenda nayo ya kushirikisha tutafikia malengo ya matakwa ya katiba zetu, sheria zetu , kanuni zetu pamoja na miongozo ya kimatafaifa ya kuweka sawa usawa wa kijinsia kati ya wanawake na wanaume katika kuongoza nafasi zozote hapa duniani,"amesema.
Ameongeza harakati za kumpigia mwanamke zimeanza muda mrefu na kuna wakati wamekwenda mpaka kwenye mkutano wa Beijingi, wamekuwa wakiandaa mijadala na makongamano."Huko nyuma tulikuwa tunaona jambo la ajabu lakini kumbe inawezekana , na jitihada hizi haziendi bure hata Mwenyezi Mungu anazitilia nguvu na ndio maana leo Tanzania ina Rais mwanamke.

Wadau wa harakati za masuala ya wanawake pamoja na viongozi wa vyama vya siasa nchini wakiwa katika mkutano uliowakutana kwa lengo la kujadiliana na kuangalia njia zinazotakiwa kuendelea kufanyika ili kufikia 50 kwa 50 katika nafasi ya uongozi nchini.

"Na kama alivyosema mwenyewe Rais Samia Suluhu Hassan kuwa amefika pale kwa kudra za Mwenyezi Mungu , wanaume hatuwezi kujisifia kwa asilimia 100 tumemfikisha pale, bali amefika pale kwa kudra za Mungu, tulichofanya tulimfikisha kwenye Makamu wa Rais maana tulisema kwa sasa anatosha mwanamke kufikia makamu wa Rais lakini Mungu akasema hapana ndio maana tuna Rais mwanamke,"amesema.
Amefafanua na Tanzania si tu imepata Rais mwanamke , bali imempata mwanamke anayejua changamoto za wanawake wengine."Tunaweza kuwa na viongozi wanawake lakini hawawajui wanawake wenzao ni nani.Rais Samia ameanzia kuwa karani wa masjala hadi kuwa Rais, hivyo anajua changamoto anazopitia mwanamke ni mwanamke.Kwa hiyo tuseme Mungu analipenda taifa hili na anawapenda wanawake."
Aidha amesema ofisi ya Msajili wa Vyama vya Siasa itaendelea kushirikiana na wadau mbalimbali wakiwemo wa vyama vya siasa kuhakikisha kuna kuwa na mazingira rafiki ya kumuwezesha mwanamke kushiriki kikamilifu katika medani za siasa na uongozi.