Papa Leo XIV amepigwa usoni na rozari iliyotupwa na mmoja wa waumini waliokuwa wamekusanyika kumlaki jijini Lima, nchini Peru, katika tukio lililonaswa kwenye kamera na kusambaa kwenye mitandao ya kijamii.
Tukio hilo lilitokea Jumatatu, Novemba 16, 2026, wakati kiongozi huyo wa Kanisa Katoliki akiwa ndani ya gari maalumu la Papa (Popemobile), akisalimia maelfu ya waumini waliokuwa wamejitokeza kumwona katika eneo la Kambi ya Anga ya Las Palmas, jijini Lima.
Katika video ya tukio hilo, Papa Leo XIV anaonekana akijaribu kupokea vitu vilivyokuwa vikitupwa na waumini kutoka kwenye umati, lakini rozari hiyo ilimkosa mkononi na kumpiga karibu na jicho lake la kulia.
Baada ya kutupiwa rozari hiyo usoni, Papa alionekana kushtuka, kugusa sehemu ya uso na kuisugua kwa muda mfupi kabla ya kuendelea kuwasalimia waumini.
VATICAN YATHIBITISHA PAPA HAKUPATA MAJERAHA
Baada ya tukio hilo, Vatican ilitoa taarifa kuwahakikishia waumini kuwa Papa hakupata madhara yoyote.
Kwa mujibu wa taarifa hiyo, Papa alitupiwa rozari ndogo alipokuwa akisalimia waumini akiwa ndani ya Popemobile mjini Lima, lakini hakupata jeraha na aliendelea na shughuli zake kama kawaida.
ROZARI HIYO ILITUPWA KWA NIA YA KUPATA BARAKA
Kwa kawaida, waumini wanapokutana na Papa wakati wa misafara yake, baadhi yao hutupa rozari, misalaba na vitu vingine vya kidini wakitarajia aviguse au avibariki.
Papa Leo XIV amekuwa akionekana kuwa na uwezo wa kunasa vitu vinavyotupwa na waumini, lakini safari hii hakufanikiwa kuipokea rozari hiyo.