Wanne wauawa kufuatia vurugu wakati wa kuagwa mwili wa Raila Odinga

Watu wanne waliuawa katika mji mkuu wa Kenya Nairobi siku ya Alhamisi baada ya vikosi vya usalama kufyatua risasi na vitoa machozi kutawanya umati mkubwa wa watu katika uwanja wa michezo ambapo mwili wa kiongozi wa upinzani Raila Odinga ulikuwa umelazwa kwa ajili ya kuagwa, vyombo vya habari vya ndani vimeripoti kulingana na shirika la habari la Reuters.

Odinga, kiongozi maarufu katika siasa za Kenya kwa miongo kadhaa, mfungwa wa zamani wa kisiasa, na mgombea urais mara tano bila mafanikio, alifariki siku ya Jumatano akiwa na umri wa miaka 80 nchini India, alikokuwa akipokea matibabu.

Wakati maelfu ya wafuasi wake wakiingia barabarani kuanzia alfajiri, machafuko yalizuka wakati umati mkubwa ulipolazimisha kufungua lango katika uwanja mkuu wa michezo wa Nairobi, na kusababisha wanajeshi kufyatua risasi hewani, shahidi mmoja aliyenukuliwa na Reuters amebainisha. Chanzo cha polisi kimeliambia shirika la habari la Reuters kwamba watu wawili walipigwa risasi kwenye uwanja huo. Habari za KTN na runinga ya Citizen baadaye zimeripoti kuwa idadi ya waliofariki imeongezeka hadi wanne na wengine wengi kujeruhiwa.

Baada ya vikosi vya usalama kufyatua risasi, polisi walifyatua mabomu ya machozi kuwatawanya maelfu ya waombolezaji, vituo vyote viwili vya televisheni vimebainisha, na uwanja kubaki tupu.

Mapema siku hiyo, maelfu ya waombolezaji walivamia kwa muda mfupi Uwanja wa Ndege wa Kimataifa wa Nairobi, na kukatiza sherehe ambapo Rais William Ruto na viongozi wengine walikuwa wapokee mwili wa Odinga kwa heshima za kijeshi.

Hii ilisababisha kusitishwa kwa saa mbili kwa shughuli za uwanja wa ndege.

Umati wa watu pia ulifurika katika mitaa ya karibu na kujaribu kuingia bungeni, ambapo serikali ilikuwa imepanga sherehe hiyo hapo awali. Ingawa alijulikana kama kiongozi wa upinzani, Odinga alikua waziri mkuu mwaka wa 2008 na pia akafanya mapatano ya kisiasa na Ruto mwaka jana.

Alihamasisha watu kujitolea miongoni mwa wafuasi wake, hasa miongoni mwa kabila lake la Wajaluo, ambao makao yao makuu yanapatikana magharibi mwa Kenya, ambao wengi wao wanaamini alinyimwa urais kwa udanganyifu katika uchaguzi.

Waombolezaji wa Odinga, ambao wengi wao walikuwa bado hawajazaliwa mwaka wa 1991, wakati Kenya ilipoanza kuwa na demokrasia ya vyama vingi, walitoa pongezi kwa uanaharakati wake. "Alipigania bila kuchoka demokrasia ya vyama vingi, na tunafurahia uhuru huu leo kwa sababu ya mapambano yake," mwanafunzi Felix Ambani Uneck ameliambia shirika la habari la Reuters katika uwanja huo, ambapo maelfu ya watu walijielekeza kwa miguu na pikipiki.