Mchezaji klabu ya Liverpool Diogo Jota afariki kwa ajili ya gari

Mchezaji wa klabu ya Liverpool na timu ya taifa ya Ureno, Diogo Jota, amefariki dunia kwa ajali ya gari nchini Hispania akiwa na umri wa miaka 28.

Kwa mujibu wa vyombo mbalimbali vya habari pamoja na taarifa rasmi kutoka mamlaka za Hispania, ajali hiyo ilitokea mapema alfajiri ya Alhamisi, Julai 3, 2025 katika mkoa wa Zamora, kaskazini-magharibi mwa Hispania. Gari walilokuwa wakisafiria lilipoteza mwelekeo na kugonga kingo za barabara kabla ya kuwaka moto.

Katika ajali hiyo ya kusikitisha, ndugu yake Diogo Jota aitwaye André Silva, pia alifariki dunia papo hapo. Wote wawili walikuwa wamesafiri kwenda kusherehekea mafanikio ya familia na walikuwa wametoka katika hafla binafsi.

Diogo Jota alijiunga na Liverpool mwaka 2020 kutoka Wolverhampton Wanderers, na amekuwa sehemu muhimu ya mafanikio ya klabu hiyo. Alifunga jumla ya mabao 65 katika mechi 182 alizochezea Liverpool, na kusaidia timu hiyo kutwaa ubingwa wa Ligi Kuu England msimu wa 2024/25, pamoja na makombe mengine ya ndani.

Katika timu ya taifa ya Ureno, Jota alicheza mechi 49 na kufunga mabao muhimu, ikiwa ni pamoja na kuchangia ushindi wa Ureno kwenye michuano ya UEFA Nations League mwaka 2025.

Taarifa hii imepokelewa kwa mshtuko mkubwa na huzuni katika ulimwengu wa soka.

Klabu ya Liverpool, Shirikisho la Soka la Ureno (FPF), wachezaji wenzake, mashabiki na viongozi mbalimbali duniani wameendelea kutuma salamu za rambirambi kwa familia ya Jota na watu wote walioguswa na msiba huu.

Diogo Jota aliacha mjane na watoto watatu, siku chache tu baada ya kufunga ndoa rasmi na mke wake mnamo Juni 22, 2025.