Ujerumani yaanza kuwarejesha nyumbani raia wa Afghanistan

Na Asha Business
August 30, 2024

Ujerumani imewarejesha nyumbani raia wa Afghanistan, ikiwa ni mara ya kwanza tangu Agosti 2021 tangu kundi la Taliban kurejea madarakani.

Ndege ya kwanza ya Qatar imeondoka mapema leo katika uwanja wa ndege Leipzig, ikiwa na raia 28 wa Afghanistan wanaotuhumiwa kwa uhalifu na waliotoka katika majimbo mbalimbali ya Ujerumani, kwa mujibu wa wizara ya mambo ya ndani ya jimbo la Saxony.

Waziri wa Mambo ya Ndani Nancy Faeser ameiita hatua hiyo kuwa ni suala la usalama wa Ujerumani, huku kukiwa na mjadala mkali wa kisiasa kuhusu sheria za maombi ya hifadhi na watu kurejeshwa nchi wanazotoka.

Ujerumani haina uhusiano wa kidiplomasia na Taliban, na kwa maana hiyo mchakato huo umefanikishwa kwa kuhusisha njia nyingine.