Arsenal Yadhalilishwa na Fleetwood

Kocha wa Arsenal, Mikel Arteta, ameelezea kipigo cha kushtua cha timu yake dhidi ya Fleetwood Town kuwa ni “siku ya huzuni kubwa” baada ya mabingwa hao wa Ligi Kuu England kutolewa katika Kombe la Ligi kwa njia ya penalti.

Arsenal ilitolewa kwa penalti 5-3 baada ya timu hizo kutoka sare ya bao 1-1 katika dakika 90 za kawaida, matokeo yaliyowapa Fleetwood, wanaoshiriki ligi ya daraja la nne nchini England, nafasi ya kusonga mbele katika hatua ya nne ya mashindano hayo.

Kipigo hicho ni miongoni mwa matokeo mabaya zaidi katika historia ya klabu hiyo yenye mafanikio makubwa, huku Fleetwood ikifanya kile kilichoonekana kuwa kigumu kwa kuishinda timu yenye wachezaji nyota na inayoshindana kileleni mwa soka la England.

Bao la Aaron Loupalo-Bi katika kipindi cha kwanza liliipa Fleetwood uongozi kabla ya Viktor Gyökeres kuisawazishia Arsenal kipindi cha pili.

Hata hivyo, Arsenal ilishindwa kutumia nafasi zake nyingi na hatimaye Bruno Guimarães akakosa penalti baada ya kipa wa Fleetwood, Jay Lynch, kuokoa mkwaju wake. Conor Haughey ndiye aliyefunga penalti ya ushindi na kuipa timu yake ushindi wa kihistoria.

Akizungumza baada ya mchezo huo, Arteta aliipongeza Fleetwood kwa kusonga mbele, huku akikiri kuwa matokeo hayo yalikuwa machungu kwa Arsenal.

“Awali ya yote, pongezi kwa Fleetwood kwa kufuzu hatua inayofuata. Kwa namna walivyofanya hivyo, kwetu sisi ni siku ya huzuni kubwa,” alisema Arteta.

Kocha huyo alisisitiza kuwa hakuwa na malalamiko kuhusu juhudi na kujituma kwa wachezaji wake, hata hivyo, alikiri kuwa timu yake ilishindwa kutumia nafasi ilizotengeneza.

Alisema Arsenal ilikuwa na umiliki mkubwa wa mpira, ilipata nafasi nyingi na kupiga mashuti kadhaa, lakini ilishindwa kuongeza tofauti ya mabao na kulazimika kutegemea penalti.

Arteta aliongeza kuwa timu yake ina jukumu kubwa la kuitetea nembo ya Arsenal kwa namna bora zaidi, akieleza kuwa kushindwa kutumia nafasi kuligharimu timu yake nafasi ya kuendelea na mashindano.

Kipigo hicho kimekuja baada ya Arteta kufanya mabadiliko tisa katika kikosi chake, akionekana kuweka kipaumbele katika mchezo wa Ligi Kuu England dhidi ya Liverpool uliopangwa Jumapili.

Uamuzi huo uligeuka kuwa wa gharama kubwa baada ya kikosi chake kushindwa kuondoka na ushindi dhidi ya Fleetwood.

Arsenal ilikuwa imeshinda Everton kwa mabao 2-0 Jumamosi, matokeo yaliyoifanya kufungana kwa pointi na vinara wa Ligi Kuu, Manchester City.

Kabla ya kukutana na Fleetwood, Arsenal ilikuwa imeshinda michezo 11 kati ya 13 iliyopita katika mashindano yote, lakini sasa imetoka katika Kombe la Ligi kwa namna ambayo imewaacha mashabiki wake wakiwa na masikitiko.

Katika dakika za mwisho za mchezo, kiungo chipukizi wa Arsenal mwenye umri wa miaka 16, Max Dowman, alionyeshwa kadi nyekundu kwa kosa la utovu wa nidhamu lililoelezwa kuwa ni kitendo cha vurugu.

Ingawa uamuzi huo ulionekana kuwa mkali kwa baadhi ya watazamaji, Arteta alionesha kutoridhishwa na tukio hilo na kusema angependa kulichunguza vizuri kupitia video kabla ya kutoa tathmini ya mwisho.

Kocha huyo alisema suala hilo lilikuwa limejadiliwa na mchezaji huyo kabla ya mchezo, akisisitiza kuwa atahitaji kutazama tena tukio hilo ili kuelewa mazingira yake kwa undani.

Fleetwood yaandika historia

Kwa upande wa Fleetwood, ushindi huo ulikuwa wa kihistoria. Timu hiyo ilionesha nidhamu ya hali ya juu kwa kujilinda kwa umakini na kutumia mashambulizi ya kushtukiza kuisumbua Arsenal.

Kocha wa Fleetwood, Matt Lawlor, alisifu juhudi za wachezaji wake, akisema hawakutarajia kuimiliki na kuichezea Arsenal kwa namna ileile ambayo timu kubwa hucheza dhidi ya wapinzani wake.

Badala yake, walilenga kufunga nafasi, kupunguza chaguo za Arsenal na kutumia kila fursa waliyopata.

“Kwa kweli siwezi kuamini. Huu ni usiku mkubwa zaidi katika historia ya klabu kwa kuzingatia aina ya mpinzani aliyekuja hapa, na tumefanikiwa kuwashinda mabingwa,” alisema Lawlor.

Aliongeza kuwa timu yake ililazimika kutumia bahati kwa kiwango fulani, lakini wachezaji wake walitekeleza vizuri mpango wa mchezo kwa sehemu kubwa.

Baada ya penalti ya mwisho kuingia, mashabiki wa Fleetwood walishangilia kwa furaha kubwa na baadhi yao kuingia uwanjani kusherehekea ushindi huo wa kukumbukwa. Lawlor mwenyewe alishindwa kuficha hisia zake na kuonekana akitokwa na machozi ya furaha.

Baada ya kuondolewa katika Kombe la Ligi, Arsenal italazimika kuelekeza nguvu katika mashindano yaliyosalia, huku mchezo dhidi ya Liverpool ukiwa miongoni mwa mitihani muhimu inayofuata.

Kwa Arteta, changamoto sasa ni kuhakikisha kipigo hicho hakivurugi morali ya kikosi chake katika mbio za ubingwa wa Ligi Kuu England.

Kwa Fleetwood, ushindi huo utabaki kuwa moja ya nyakati kubwa zaidi katika historia ya klabu hiyo, baada ya kuiondoa Arsenal katika mashindano ambayo ilitarajiwa kuwa na nafasi nzuri ya kuendelea.