Landilodi Adaiwa Kufungulia Maji Taka Katika Nyumba ya Mpangaji Kumfukuza

Mmiliki wa nyumba huko Githurai 44, kaunti ya Nairobi, anashutumiwa baada ya kudaiwa kuziba mfumo wa mifereji ya vyoo, na kusababisha mtiririko wa maji machafu kwenye nyumba ya mpangaji wake.

Mpangaji aliyefadhaika, aliyetambulika kwa jina la Irene, aliwasiliana na Afisa Mkuu wa Mazingira wa Kaunti ya Nairobi, Geoffrey Mosiria, ambaye alizuru majengo hayo. Katika video iliyosambazwa na Mosiria kwenye Facebook, hali ya nyumba hiyo inaonekana, huku maji machafu yakifurika nyumbani kwa sababu ya choo kuziba.

Irene alidai alitofautiana na 'caretaker' huyo ambaye alidai kuwa aliagizwa na mwenye nyumba kuziba kwa makusudi mifereji ya maji. "Mlinzi alivua nguo zangu kwenye kamba, nilipomwomba azirudishe alinipiga teke, nikamtaka akamatwe, lakini mwenye nyumba alimlipia bondi," alisema mpangaji. Alisimulia kwamba alikuwa amemjulisha mwenye nyumba kwamba haelewani na mtunzaji huyo na alitaka tu nguo zake zirudishwe ili aondoke kwenye jengo hilo. "Aliniambia niondoe kesi dhidi ya caretaker ikiwa nilitaka kubaki kwenye ghorofa hiyo. Vinginevyo, niondoke. Pia alimwambia mlinzi azime umeme nyumbani kwangu, ndipo nilipoenda kwa mahakama," Irene alisema.

Mpangaji huyo aliyeharibikiwa aliongeza kuwa baadaye alishuhudia mlinzi huyo akizuia mkondo wa maji kuelekea nyumbani kwake, na kudai mwenye nyumba alitishia kuacha hivyo hadi afikishwe mahakamani. Irene anaamini kuwa vitendo hivi vyote vililenga kumlazimisha kuondoka kwenye nyumba hiyo.

Akizungumza kwa njia ya simu na afisa wa kaunti hiyo, mwenye nyumba huyo alidai kuwa alipata mali hiyo hivi majuzi na amekuwa tu mwenye nyumba wa Irene kwa muda wa miezi miwili iliyopita.

Alisema nyumba hiyo ilikuwa na masuala mengi na kuhitaji ukarabati, jambo lililomfanya ampe Irene notisi ya kuondoka Aprili. Aliongeza kuwa alimrudishia kodi kwa mwezi huo ili aweze kupata mahali pengine pa kuishi.

"Nilinunua nyumba mnamo Januari na nikaanza kuisimamia Machi. Nilimwambia aondoke ili tufanye ukarabati. Hata nilimrudishia kodi yake na kumpa notisi ya mwezi mmoja kuondoka," alisema. Mwenye nyumba huyo alisema muda wa notisi ulipoisha, Irene alimpeleka kwenye mahakama na kuwasilisha amri ya mahakama ya kuzuia kufukuzwa kwake. "Nilimuuliza jinsi alivyotarajia turekebishe wakati bado anaishi katika nyumba hiyo. Afisa wa kaunti hata alitembelea na fundi bomba ambaye alipendekeza kuondoa kabisa choo ili kurekebisha mifereji ya maji, lakini hatuwezi kufanya hivyo akiwa bado ndani," alieleza.