Mshukiwa mkuu wa kisa cha mtoto kung’olewa macho awekwa rumande

Bi Pacificah Nyakerario, 60, alikamatwa na maafisa wa upelelezi Jumatatu usiku katika maficho yake jijini Nairobi, na kusafirishwa kurudi nyumbani na makachero hao.

Alikuwa ametoroka Kisii mnamo Desemba 14, baada ya Sagini kushambuliwa katika kisa ambapo macho yake yaling’olewa kikatili katika kijiji cha Ikuruma, Kaunti Ndogo ya Marani.

Sagini aligunduliwa akiwa ametelekezwa katika shamba la mahindi lililo karibu na kwao.

Alikimbizwa hospitalini kupata matibabu.

Mshukiwa huyo alifikishwa mbele ya Hakimu Mkazi Mkuu, Bi Christine Ogweno Jumanne asubuhi lakini hakujibu chochote.

Hakimu Ogweno alisema mwanamke huyo atasalia rumande hadi Ijumaa wiki hii ambapo atarudishwa tena kortini kesi yake itakapotajwa.

Wakati huo huo, nusura kizaazaa kizuke nje ya mahakama hiyo, baadhi ya wanawake waliokuwa wamekusanyika hapo kufuatilia kesi, kudai kuwa amechafua jina la watu watokao Marani.

Hata hivyo, polisi walifanikiwa kutuliza mvutano wao.

Akiwa kizimbani, Bi Nyakerario alilia kwa uchungu upande wa mashtaka ulipokuwa ukimsomea mashtaka yake.

“Utarudishwa rumande katika Kituo cha Polisi cha Rioma hadi Ijumaa wiki hii utakapofikishwa hapa kwa ajili ya kutajwa kwa kesi yako,” Hakimu alisema huku akimtaka mkuu wa kituo cha polisi kumhakikishia usalama wake.

Bi Nyakerario, ambaye ni shangazi wa Sagini, alifikishwa mahakamani siku moja baada ya mshukiwa wa kwanza ambaye ni mwanawe – Alex Maina Ochogo,28, kufikishwa mbele ya hakimu huyo pia.

Sagini na dadake mkubwa Shantel Ongaga, 7, watahamishwa hadi kwenye hifadhi salama jijini Nairobi.

Gavana wa Kisii Simba Arati, juzi alisema kwamba alipokea simu kutoka kwa Waziri wa Jinsia Aisha Jumwa akimjulisha kuhusu dhamira ya serikali ya kuhakikisha watoto hao wanaendelea kupata matibabu na utunzaji.

“Jioni hii nilipokea simu kutoka kwa Waziri Jumwa na akakubaliana nami kwamba watoto hao wawili wapelekwe kwenye hifadhi nzuri na salama Nairobi. Nimeagiza gari la kaunti lipatikane ili kuwapeleka watoto hao huko,” Bw Arati alisema.

Hatua hii ilijiri saa chache baada ya Mwakilishi wa Wanawake wa Kisii, Bi Dorice Aburi, mwenzake wa Busia Catherine Omanyo na seneta mteule Gloria Orwoba kumtembelea Bi Jumwa katika afisi yake jijini Nairobi ambapo walijadili hali ya Sagini.

Katika mkutano huo, Bi Aburi alibainisha pia kuwa walijadiliana kuhusu jinsi anavyoweza kufanya kazi na serikali ya kitaifa ili kulinda na kukuza ustawi wa Wakenya.

Aliongeza kuwa mipango ya kuwa na kituo cha kuwaokoa wanaonyanyaswa, kilichojengwa mjini Kisii imeanza kwa kasi na hivi karibuni kitaanza kufanya kazi.

Jana Jumanne, maafisa kutoka idara ya kuwalinda watoto walimchukua dadake Sagini kutoka kijijini Ikuruma huku mipango ya kuwasafirisha wawili hao Nairobi ikikaribia kutamatika.