Watu 22 Waangamia na Mafuriko Uganda

Idadi ya watu waliongamania katika mafuriko jijini Mbale nchini Uganda imeongezeka na kufika watu 22 huku wengine 10 wakiwa katika hali mahututi kulingana na polisi.

Mito miwili ilivunja kingo zake kufuatia mvua kubwa iliyonyesha katika mji huo wa mashariki mwa Uganda na kusababisha mmomonyoko wa udongo na uharibifu mkubwa na kuwalazimisha wakaazi kukimbia maboma yao.

ā€¯Idadi ya walioangamia katika mafuriko ya Mbale imefika watu 22. Watu wengine kumi wako hali mahututi," Fred Enanga, msemaji wa polisi nchini Uganda aliambia shirika la habari la AFP.

Watu wengine walipatikana wakiwa wamekwama kwenye basi dogo, Enanga akisema kuwa wengi wa waliokuwa katika gari hilo walikuwa jamaa na marafiki waliokuwa safarini wakielekea katika sherehe lakini wakasombwa na mafuriko.

Kwa mujibu wa ripoti ya AFP. Miili mitano iliopolewa kutoka kwa gari hilo ambalo lilikuwa limezama katika maji huku vikosi vya uokoaji vikiendelea na shughuli ya kutafuta waathiriwa zaidi katika mabaki ya gari hilo.

Mamlaka zimeshauri watu kuhamia maeneo salama mvua inapoendelea kutikisa Mbale ambao ni mji ulio kilomita 300 mashariki mwa jiji kuu la Kampala.

Waziri Mkuu Robinah Nabbanja aliyezuru eneo la mkasa alisema kuwa maafa hayo yangeupukika iwapo watu hawangekaribia kiko za mito.

Wilaya ya Mbale ina watu laki tano kwa mujibu wa hesabu ya watu iliyofanywa mwaka 2020; idadi hii ikiifanya kuwa mojawapo ya maeneo yenye idadi kubwa ya watu nchini Uganda.

Pata Habari Kupitia Mitandao Yetu Ya Kijamii