CHADEMA "IPU isikilize pande zote hali ya Tanzania"

Chama cha Demokrasia na Maendeleo (CHADEMA) kimeiomba Jumuiya ya Mabunge Duniani (IPU) kusikiliza maoni kutoka kwa wadau mbalimbali kuhusu hali ya siasa na demokrasia nchini Tanzania, badala ya kutegemea taarifa kutoka upande mmoja.

Katibu Mkuu wa CHADEMA, John Mnyika amesema maelezo yaliyowasilishwa kuhusu hali ya demokrasia nchini hayakuakisi, kwa mtazamo wa chama hicho, hali halisi iliyopo, hivyo IPU inapaswa kupata taarifa kutoka kwa makundi mbalimbali.

Amesema IPU inaweza kupata picha pana zaidi kwa kukutana na wananchi, viongozi na wanachama wa vyama vya siasa, wakiwemo wale ambao chama hicho kinadai wameathiriwa na matukio mbalimbali ya kisiasa.

Kwa mujibu wa Katibu Mkuu huyo, CHADEMA pia inataka IPU kufahamu madai yake kuhusu watu waliopoteza maisha wakati wa uchaguzi pamoja na viongozi na wanachama wa chama hicho wanaokabiliwa na kesi zinazohusishwa na ugaidi na uhaini.

Aidha, chama hicho kimemtaka Katibu Mkuu wa IPU, Anda Filip, kukutana na viongozi wake, akiwemo Tundu Lissu, ili kupata maelezo kuhusu changamoto wanazodai kukabiliana nazo.

CHADEMA imesema uwepo wa IPU nchini wakati wa Mkutano wa 153 unaofanyika Arusha ni fursa ya kujadili masuala ya demokrasia na changamoto za kisiasa kwa kusikiliza mitazamo kutoka pande mbalimbali. Mkutano huo unafanyika Oktoba 5 hadi 9, 2026, na ajenda yake rasmi inajumuisha mjadala kuhusu utawala bora na uwezeshaji wa jamii.