Israeli imedai kumuua mkuu wa kijeshi wa Hamas Mohammed Deif katika shambulio

• Na Asha Business
• August 1, 2024

Jeshi la Israeli limedai kumuua mkuu wa kijeshi wa wapiganaji wa Hamas Mohammed Deif katika shambulio lake la mwezi uliopita katika mji wa  Khan Yunis kusini mwa Gaza.

Madai ya Israeli kumuua Deif yamekuja ikiwa imepita siku moja baada ya kuuawa kwa mkuu wa kisiasa wa Hamas Ismail Haniyeh  mjini Tehran, maujai ambayo yalithibitishwa na Iran na Hamas.

Kwa mujibu wa taarifa ya jeshi la Israeli, IDF, Mohammed Deif aliuuawa katika shambulio la ndege za kivita katika eneo la Khan Yunis tarehe 13 ya mwezi Julai.

Israeli  inasema Deif alipanga na kutekeleza shambulio la tarehe saba ya mwezi Oktoba katika ardhi yake, shambulio ambalo watu  1,197 waliuuawa kwa mujibu wa takwimu za jeshi la Israeli.

Idara ya afya katika ukanda wa Gaza inayoongozwa na wapiganaji wa Hamas ilisema kwamba watu zaidi ya 90 walikuwa katika eneo kulikotokea shambulio la tarehe 13 mwezi Julai lakini ilikana kuwepo kwa Deif.

Jeshi la Israeli pia limedai kuwa Deif katika kipindi cha miaka mingi amekuwa akitekeleza mashambulio dhidi ya ardhi yake.