Kenya yatuma kikosi kipya kusaidia MONUSCO

Kundi la kwanza la kikosi cha nne cha jeshi la Kenya (KENQRF 4) kimetumwa rasmi DRC tangu siku ya Jumamosi Agosti 24, kuashiria kuanza kwa misheni yao ya kulinda amani nchini humo.

Sherehe ya kuondoka ilifanyika katika Uwanja wa Ndege wa Kimataifa wa Jomo Kenyatta (JKIA) na ilisimamiwa na Stephen Kapkory, Kamanda wa kambi ya jeshi la anga ya Embakasi. Kikosi cha 4 cha KENQRF kinaungana na Ujumbe wa Umoja wa Mataifa wa Kuimarisha Udhibiti katika Jamhuri ya Kidemokrasia ya Kongo (MONUSCO), ambao una jukumu la kulinda maeneo ambayo hayajakuwa na amani ya mashariki mwa DRC.

“Nina imani na kiwango chenu cha mafunzo na taaluma. Muwe mabalozi wazuri wa Jamhuri ya Kenya kwa kudumisha kiwango cha juu cha taaluma na nidhamu katika matendo yenu yote na kuendeleza utendakazi wa kupigiwa mfano wa watangulizi wenu,” Stephen Kapkory alisema wakati wa hotuba yake.

Kikosi cha KENQRF 4 kitashiriki katika operesheni mbalimbali, ikiwa ni pamoja na hatua dhidi ya makundi yenye silaha, ulinzi wa raia, kuunga mkono juhudi za kibinadamu, pamoja na usaidizi wa kuwapokonya silaha, kuwaondoa askari na kuwajumuisha tena wapiganaji wa zamani katika vikosi vya ulinzi na usalama. Kazi hizi zilitekelezwa kwa mafanikio na vikosi vya zamani, na timu mpya iko tayari kuendelea na juhudi hizi.

Luteni Kanali Simon Seda, Kamanda wa KENQRF 4, pia alionyesha imani yake katika maandalizi ya wanajeshi wake. “Wanaume na wanawake wetu wako tayari kwa kazi inayowangoja. Wamepitia mafunzo makali na wamepewa ujuzi unaohitajika kutekeleza misheni hii. Tumedhamiria kuchangia katika kurejesha amani na utulivu nchini DRC,” alisema.

Katika tukio jingine mashuhuri, Brigedia Kapkory alikaribisha kundi la kwanza la wanajeshi la KENQRF 3, wanaorejea kutoka DRC. Alipongeza juhudi kubwa walizozifanya katika kuleta utulivu eneo la Mashariki mwa nchi na kupongeza weledi wao katika kutekeleza majukumu yao kwa kuzingatia viwango vya juu vya nidhamu ya Kanuni za Maadili za Umoja wa Mataifa.

MONUSCO, ambayo hatua kwa hatua inapunguza uwepo wake nchini DRC, inaendelea kuwa na jukumu muhimu katika kulinda eneo la mashariki mwa nchi hiyo kwa ushirikiano na vikosi vingine. Tarehe 7 Agosti, ujumbe huo ulikaribisha kupitishwa na Baraza la Usalama la azimio nambari 2746, likiidhinisha kuimarishwa kwa uungaji mkono wake kwa Ujumbe wa Jumuiya ya Maendeleo ya Kusini mwa Afrika katika Jamhuri ya Kidemokrasia ya Kongo (SAMIDRC).