Mahakama ya Upeo Kutoa Leo Sababu Kamili za Kutupa Nje Kesi ya Raila Odinga

Mahakama ya Upeo inatazamiwa leo Jumatatu, Septemba 26, kutoa sababu kamili za kutupilia mbali kesi ya kupinga matokeo ya uchaguzi wa urais wa Agosti 2022, iliyowasilishwa na Raila Odinga.

Katika taarifa iliyotumwa kwa vyombo vya habari na Msajili wa Mahakama ya Upeo, Leticia Wachira alisema uamuzi huo utasambazwa kwa wahusika wote kupitia barua pepe mwendo wa saa nane mchana.

Majaji wa Mahakama ya Juu Zaidi wakiongozwa na Jaji Mkuu Martha Koome walikuwa wameomba muda wa siku 21 kuandaa uamuzi kamili wa kesi hiyo.

Akitoa uamuzi wa kufutilia mbali kesi hiyo mnamo Jumatatu, Septemba 5, Koome alitangaza kuwa kesi iliyowasilishwa na Raila na mgombea mwenza wa Azimio La Umoja, Martha Karua, ilikuwa hewa moto tu bila ushahidi wa kutosha.

Kinara wa ODM alionyesha kutoridhishwa na uamuzi wa Mahakama hiyo akisema ingawa wanaheshimu maoni ya mahakama hiyo, hakubaliana na uamuzi waliotoa wa kuafiki ushindi wa Ruto.

Raila alisema mawakili wake waliwasilisha ushahidi wa kutosha ulioashiria walichokuwa wakilalamikia, ila mahakama hiyo iliamua kuchukua mkondo mbadala.

Raila aliongeza kusema ameshangazwa na jinsi mahakama hiyo imetupilia mbali mashtaka 9 yaliyowasilishwa, huku majaji wakitumia lugha nzito kupinga madai yao.

Pata Habari Kupitia Mitandao Yetu Ya Kijamii